དེ་རིང་རང་ཚོད་ཀྱིས་སྔོན་ཆད་ཚོད་ལྟ་ཙམ་ཡང་བྱས་མྱོང་མེད་པ་དང་། ཅུང་སྒྲུབ་དཀའ་བའི་ལས་དོན་ཞིག་ལེགས་འགྲུབ་བྱུང་སོང་། རང་གི་རེ་བཞག་བྱས་པ་ཇི་བཞིན་དུ་དེ་འདྲའི་ཕུན་སུམ་ཚོགས་པ་ཞིག་མ་ཡོང་མོད། ལེགས་འགྲུབ་བྱུང་ལ། རྒྱལ་ཁ་ཡང་ཐོབ་སོང་བས། དགའ་སྣང་སྐྱེ་བ་ཞིག་ཆགས། རྒྱུན་དུ་བྱ་བ་གང་ལ་འཇུག་ཀྱང་རང་གི་རེ་སྨོན་བྱས་པ་ནང་བཞིན་ཞིག་འགྲུབ་དཀའ་བ་འདྲ། དེ་ནི་ཧ་ལམ་རེ་བ་མཐོ་དྲགས་པ་དང་ཕུན་སུམ་ཚོགས་པའི་འབྲས་བུ་ཞིག་ལ་རེ་ལྟོས་ཆེ་དྲགས་པས་ཀྱང་ཡིན་ས་རེད། རྒྱ་སྐད་ལྟར་ན།(完美主义者) ཞེས་པ་དེའི་རིགས་སུ་གཏོགས་པར་འདུག འཇིག་རྟེན་སྟེང་ཆེས་ཆེ་བའི་སྒུལ་ཤུགས་ནི། རང་ཉིད་ཀྱི་ཡར་བསྐྱེད་མཐོང་བ་དང་བྱ་བ་གང་ཞིག་ལེགས་འགྲུབ་བྱུང་བའི་འགྲུབ་ཚོར་གྱིས་གནང་བའི་སྤྲོ་སྣང་དེ་ཡིན་ཞེས་པ་དེ། ཤིན་ཏུ་གནད་ལ་ཁེལ་བའི་གཏམ་ཞིག་ཏུ་མཐོང་ཡོང་སྟེ། གྲུབ་འབྲས་ཅུང་ཙམ་རེ་རྙེད་པའི་གོ་རིམ་ཁྲོད་ནས་རང་ཉིད་ལ་རིན་ཐང་འདུག་གོ་སྙམ་པའི་ཚོར་སྣང་རྟ་རྔ་ཙམ་དེས་བྱིན་པའི་སྒུལ་ཤུགས་ནི། ཕ་མ་དང་དགེ་རྒན་ཚོའི་བཀའ་སློབ་བརྒྱ་ཡི་སྒུལ་ཤུགས་ལས་ཀྱང་ལྡབ་འགྱུར་གྱིས་ཆེ་བ་འདྲ། དཔེར་ན། སྙན་ངག་ལ་དགའ་མཁན་ཚོར་ཆ་བཞག་ན། རང་གི་བརྩམས་ཆོས་ཤིག་དུས་དེབ་ཅུང་སྐད་གྲགས་ཅན་ཞིག་གི་སྟེང་དུ་བཀོད་འདུག་པ་མཐོང་བ་ན། དེས་ནི། སྙན་ངག་གི་དགའ་ཞེན་སྔར་ལས་ཀྱང་ལྡབ་འགྱུར་གྱིས་ཇེ་དྲག་ཏུ་བཏང་སྟེ། སྙན་ངག་ལ་འཇུག་འདོད་ཀྱི་ངར་ཤུགས་དང་བརྩོན་སེམས་ཀྱང་གཞན་དང་མི་མཚུངས་པ་ཞིག་སླེབས་རྒྱུ་ཡོད་པ་དེ་དང་འདྲ་བོ་རེད། རང་གཅུན་ཡོང་ཐུབ་མིན་གྱི་རྩ་བ་ཡང་། སོ་སོ་རང་སྟེང་གི་ཐུན་མིན་གྱི་རིན་ཐང་དང་འཇོན་ནུས་ངོ་ཤེས་ཐུབ་མིན་རང་ལ་རག་ལས་ཞེས་པ་དེ་ཡང་། གོང་སྨོས་ཀྱི་གནས་ལུགས་དེ་དང་གནད་གཅིག་ཏུ་སོང་ཡོད་གཤིས་ཆེའོ།།

༄༅།།སེམས་ཚོར།
རིགས་ཀྱི་སྐྱིད་སྡུག་འཁུར་ལ་སྤོབས་པ་དབེན།།
སློབ་མ་བུ་ལྟར་སྐྱོང་བའི་སྙིང་སྟོབས་ཞན།།
སྦྱོར་བར་བསླབ་གཞི་དཔྱོད་པའི་གནས་སྐབས་ཕྲ།།
དངོས་གཞིར་གཞུང་དོན་འགྲོལ་བར་འཆར་གཞི་མེད།།
རྗེས་སུ་སྦྱང་ཚན་བཅོས་པར་སུན་སྣང་སྐྱེས།།
འདི་དག་དགེན་མིང་འཛིན་པ་སུ་ལ་ཡོད།།

ཁ་ཝ་རྦ་ཐ•ཡ་སུ་ན་རི་ལགས་དང་། མི་ཞི་མ•ཡུ་ཁི་ཨོ་ལགས་རྣམ་གཉིས་ནི་ང་རང་ཆེས་དགའ་བའི་ཉི་ཧོང་གི་རྩོམ་པ་པོ་གཉིས་ཡིན། ཁོང་གཉིས་པོའི་རྣམ་ཐར་དང་གསུང་འབུམ་ཕྱོགས་བསྒྲིགས་རྒྱ་འགྱུར་མ་རེ་བླུས་ནས་ད་ལོའི་དཔེ་དེབ་བླུ་མཚམས་བཅད་པར་བྱས་སོ། །[允悲]