༄༅།།ཚོར་བའི་རླབས་རིས། བཀོད་མཛེས་ཡིད་འོང་མ

首页发布

༄༅།།ཚོར་བའི་རླབས་རིས།

བཀོད་མཛེས་ཡིད་འོང་མདོ་རྒྱུད་ལེགས་བཤད་ཀྱི་ཁང་པའི།།
ངེས་ལེགས་ལོངས་སྤྱོད་རྫོགས་པའི་ནང་བཀོད་དེ་ཡག་ཀྱང་།།
མཚན་ལྡན་བླ་མའི་མན་ངག་ལྡེ་མིག་དེ་མེད་ན།།
ཤེས་རབ་ཨུ་ཚུགས་ཅན་དེ་ཐར་རབས་ནི་མི་འདུག།

བྱིན་རླབས་བདུད་རྩིའི་གདམས་ངག་སྙིང་དབུས་སུ་འཁྱིལ་བའི།།
ངེས་དོན་བུམ་པ་བཟང་པོའི་བཤེས་གཉེན་ཞིག་མེད་ན།།
ཚུལ་མིན་ལས་ཀྱིས་བསྐྱེད་པའི་ཐོག་མེད་ཀྱི་གཅོང་ནད།།
ཐ་མལ་ཆུ་རྒོད་ཙམ་གྱིས་དག་ཐབས་ནི་མི་འདུག།།

སྔོན་བསགས་རྣམ་དཀར་ལས་འབྲས་བསོད་ནམས་ཀྱི་ཞིང་སར།།
བརྟན་མཁས་བཤེས་གཉེན་ཨུ་དམ་ཝ་ར་ཞིག་འཁྲུངས་ཏེ།།
བྱམས་བརྩེའི་འདབ་མ་རིས་མེད་འགྲོ་བ་ལ་བརྐྱངས་ན།།
མ་འདྲིས་མཛའ་བཤེས་སྟོན་མཆོག་ཁྱེད་ཉིད་ལས་མི་འདུག།

གུ་ཡངས་བློ་བདེ་ཨ་ཏིའི་མཁའ་དབྱིངས་སུ་འབྱམས་ཤིང་།།
བསྒོམ་མེད་འོད་གསལ་འཁོར་ལོའི་སྲོག་གནད་དེ་ཆུབ་པའི།།
རྒྱལ་སྲས་ས་འཛིན་སྤྱོད་པའི་མཛད་པ་ལ་བསམས་ན།།
ཆོས་སྐུ་ཀུན་བཟང་ཟེར་བ་ཁྱེད་ཉིད་ལས་མི་འདུག།

དུག་ལྔའི་རྟོག་པའི་འཚང་ཁ་བར་མེད་དུ་རྒྱག་ཅིང་།།
བག་མེད་ཆང་གིས་སྨྱོས་པའི་ར་རོ་ཡི་བུ་ལ།།
ཞལ་གསུང་ལྷ་ཆབ་གཙང་མའི་ཞལ་ཏ་ལ་བསམས་ན།།
ཕ་གཅིག་བླ་མ་ཟེར་བའི་ངེས་ཤེས་ཏེ་རྙེད་ཡོང་།།

ཁྱེད་སྐུ་དཔག་བསམ་ལྗོན་པའི་བསིལ་གྲིབ་ལ་བཅར་ན།།
ངེས་འབྱུང་རླུང་བུ་འཇམ་པོའི་རེག་བྱ་དེ་མྱོང་ལ།།
ཉོན་མོངས་ཚ་གདུང་སེལ་བའི་ནུས་པ་ལ་བསམས་ན།།
སྙིང་རྗེའི་བྱིན་རླབས་གོས་ཀྱི་དྲོད་ཁོལ་དེ་ཚོར་ཡོང་།།

གུས་ལྡན་དོན་གཉེར་སློབ་བུ་སྦྲང་ཆུང་གི་ཚོགས་ལ།།
ཉིན་མཚན་མི་དལ་ཆོས་ཕུང་བརྒྱད་ཁྲི་ཡི་སྙིང་བཅུད།།
མདོ་སྔགས་ཟེ་འབྲུ་གསར་བའི་དགའ་སྟོན་ལ་བསམས་ན།།
ས་སྟེང་བླ་མས་གང་ཡང་ཁྱེད་ལྷག་ཅིག་མི་འདུག།

ཆོས་བརྒྱད་འབྲུག་སྒྲ་རྒོད་པའི་སྙིགས་མ་ཡི་དུས་འདིར།།
ཆོས་མིན་གཟིག་ལྤགས་གྱོན་པ་ཤ་མོ་བཞིན་རྡོལ་ཡང་།།
ཆོས་མཐུན་སྐྱེ་བུའི་མ་བཅོས་ལྷད་མེད་ཀྱི་རང་བཞིན།།
ཆོས་ཚུགས་གསེར་གྱི་གར་བུའི་རང་མདངས་ནི་ལྷམ་མེ།།

རྩོད་ལྡན་ཡང་མཐར་སྐྱེས་པའི་ལས་དམན་གྱི་ཁྱུ་ཚོགས།།
སྔོན་བྱོན་རྒྱལ་བས་མ་ཐུལ་ལྷག་མ་རུ་ལུས་ཀྱང་།།
ཐུགས་བསྐྱེད་གོ་ཆ་བཙན་པོའི་སྨོན་ལམ་ལ་བསམས་ན།།
ཐུགས་རྗེ་གཞན་ལས་མྱུར་བའི་ཨོ་རྒྱན་དང་མཚུངས་བྱུང་།།

ཅོལ་ཆུང་གཡམ་རྒྱུག་མཁས་པའི་ཅལ་འདྲོགས་ཀྱི་སྐྱེ་བོར།།
གཅམ་ཚིག་ངག་གིས་བཀུར་བའི་བླ་མ་ནི་མང་ཡང་།།
ཨུ་ཚུགས་ལྕགས་ལས་བརྡུང་བའི་ཐ་མལ་གྱི་བུ་ལ།།
ལྷ་གཅིག་གསོལ་བ་འདེབས་ས་ཁྱེད་ཉིད་ལས་མི་འདུག།

༨༽འགྲོ་མིའི་རྐང་ལམ་དུ་འཐོར་བའི་སྡོང་ལོ་འདི་དག་ནི། ཉི་འོད་ཀྱིས་གསོན་ཞིང་ཉི་འོད་ཀྱིས་འཆི་བར་ཡང་སྐྱེལ་དགོས་པ་ཞིག་རེད། རྨི་ལམ་ཐུན་གཅིག་གི་རྗེས་སུ་བདག་གི་ཚེ་སྲོག་ཀྱང་རྐང་རྡུལ་ཁྲོད་ཀྱི་སྡོང་ལོ་ནང་བཞིན་ཆེས་མཐའ་མཇུག་གི་གནས་ཏེར་སླེབ་འགྲོ་སྲིད། གལ་ཏེ་ང་ལ་ད་དུང་རྨི་ལམ་མང་པོ་ཞིག་རྨི་བའི་དུས་ཚོད་ཡོད་ན། རྨི་ལམ་དེའི་ཁྲོད་ནས་བདག་གི་ཚེ་སྲོག་འདིའི་མཐའ་མཇུག་གི་གནས་མལ་དེར་ད་ནས་ཁ་ཡིག་ཅིག་འབྲི་བར་འདོད། ད་དུང་འཆི་བདག་གི་ཞགས་པ་དེ་ཡང་མེ་ཏོག་གི་མགུལ་རྒྱན་ཞིག་ཏུ་བསྒྱུར་ན་འདོད། འོན་ཀྱང་མང་པོ་ཞིག་བཤད་ཐུབ་པ་ལས་སྒྲུབ་པ་ཐུབ་པ་ཞིག་ཁྱོན་ནས་མ་རེད། དེ་ནི་བདག་ལ་ད་དུང་ལས་ཉོན་གྱི་ཞྭ་མོ་མཐུག་དྲགས་པས་རེད་ཟེར།#叶西达瓦[超话]#