࿐བློ༵་གྲོས་སྒོམ་པའི་སྟོབས་རབ་རབ་རྒྱས་པའི། །
བཟ༵ང་པོའི་རྟགས་མཚན་དུ་མས་རབ་རྒྱན་ནས། །
སྙ༵ན་པའི་བ་དན་ས་གསུམ་ཀུན་ན་ཁྱབ། །
འབྲུག་ལྟར་གྲ༵གས་པའི་མཚན་སྙན་ཁྱོན་ཀུན་ཁྱབ། ། ཚ་བུ་ནས་བྲིས།

࿐རྗེ་ཉིད་ཀྱི་སྐྱེས་ཕྲེང་གསོལ་འདེབས་ལས།

རྩ་གསུམ་ཁྱབ་བདག་པད་འབྱུང་འཕྲིན་ལས་གར།།
 

གང་འདུལ་སྣང་ངོར་བཻ་རོའི་རྣམ་པར་འཕྲུལ།།
 

མཁས་གྲུབ་ཡོངས་ཀྱི་གཙུག་རྒྱན་ཆོས་ཀྱི་རྗེ།།

ཤེས་རབ་རྒྱལ་མཚན་ཞབས་ལ་གསོལ་བ་འདེབས།།

࿐༧ཨོ་རྒྱན་ཁྲག་འཐུང་གླིང་པའི་གཏེར་ལུང་ལས།

དེ་རྗེས་སུམ་ལྡན་རྣལ་འབྱོར་ཚུལཿ

དཔྲལ་བར་ཡེ་ཤེས་སྤྱན་གཟིགས་ཅནཿ

བཻ་རོ་ཙྭ་ནའི་རྣམ་འཕྲུལ་འབྱུང་ཿ

བསྟན་པ་ཕྱོགས་མཐར་རྒྱས་པར་འགྱུརཿ

࿐༧སངས་རྒྱས་གླིང་པའི་གཏེར་ལུང་ལསཿ
   

མི་ཡི་སེང་གེ་ཤེས་རབ་སྟོབས་དང་ལྡནཿ

ཆ་ལུགས་མ་ངེས་ཅི་ཡང་སྟོན་བྱེད་ཅིངཿ

བསྟན་པའི་སྲོག་འཛིན་རྒྱལ་མཚན་མིང་ཅན་ཞིགཿ

གདུག་པ་འདུལ་བའི་འགྲོ་བ་དཔག་མེད་འདྲེནཿ

དུས་རབས་ཉི་ཤུ་པའི་ནང་དུ་ཕྲ་བའི་འཇིག་རྟེན་གྱི་རྣམ་གཞག་གི་ཐད་ལ་གསར་མཐོང་གི་རིག་པ་ཁྱད་པར་བ་གསུམ་སྟེ། དང་པོ་རྡུལ་ཕྲན་གྱི་རིག་པ། གཉིས་པ་ལྟོས་བཅས་ཀྱི་རིག་པ། གསུམ་པ་ཚད་རྡུལ་གྱི་རིག་པ་སྟེ། དེ་དག་ཐམས་ཅད་སངས་རྒྱས་པའི་གཞུང་ལས་སྔར་ནས་གསལ་བར་གསུངས་ཟིན་ཅིང༌། ད་ལྟ་ཚན་རིག་གིས་བདེན་དཔང་བྱས་པ་ལྟ་བུར་གྱུར་པ་དང༌། དེ་ལས་གཞན་སངས་རྒྱས་ཀྱི་གསུང་རབ་ལས་གསུངས་པའི་རྒྱ་ཆེ་ཞིང་གཏིང་ཟབ་པའི་ཤེས་རབ་དང༌། ཤེས་རབ་དེའི་བྱེད་ལས་སྡུག་བསྔལ་གྱི་རྣམ་གྲངས་སྣ་ཚོགས་པ་ལས་གཏན་དུ་ཐར་ནས་བདེ་སྐྱིད་བླ་ན་མེད་པ་སྐྲུན་པ་དང༌། བདག་གཞན་མཉམ་པ་དང༌། བདག་གཞན་བརྗེ་བ། བདག་བས་གཞན་གཅེས་ལྟ་བུའི་རླབས་ཆེན་གྱི་བསམ་པ་ཕུན་སུམ་ཚོགས་པ་དག་ནི་མིའི་རིགས་ཀྱི་ལོ་རྒྱུས་མགོ་ཚུགས་པ་ནས་བཟུང་ད་ལྟའི་བར་དུ་སངས་རྒྱས་པའི་ལུགས་ཁོ་ན་ལས་གཞན་གང་ནས་ཀྱང་མ་བྱུང་བར་ཤེས་པར་བྱའོ།།

࿐མཁན་པོ་ཚུལ་ཁྲིམས་བློ་གྲོས་ཀྱིས།