࿐བཤེས་གཉེན་དམ་པ་སྤྲུལ་ཤེས་རབ་རྒྱལ་མཚན་མཆོག་གི་སྐུའི་གྱ་སྟོན་ལ་བརྟན་གསོལ་འཆི་མེད་རྔ་སྒྲ།

གདོད་མའི་གཞི་དབྱིངས་ཆོས་སྐུའི་ཞིང་ཁམས་ལས།།
མ་གཡོས་འཕོ་བྲལ་བདེ་ཆེན་ཟུང་འཇུག་ཐུགས།།
ལྷུན་གྲུབ་སྐུ་གསུམ་རོལ་པའི་རྩལ་རྫོགས་པ།།
བརྒྱུད་གསུམ་རྩ་གསུམ་བླ་མའི་ཤིས་པ་སྩོལ།།

དཔལ་ལྡན་ཚོགས་གཉིས་མཚོ་ཆེན་བསྲུབས་པ་ལས།།
ཁྱེད་སྐུ་མཚན་དཔེ་ལང་ཚོའི་འོད་དཀར་འཛུམ།།
བརྩེ་ཆེན་སྙིང་རྗེའི་མངའ་བདག་འགྲོ་བའི་མགོན།།
མི་ཡི་རྫུར་ལ་བྱོན་པའི་སེམས་དཔའ་ཆེ།།

འཇིགས་རུང་འཁོར་བ་སྒྱུ་མའི་གྲོང་ཆེན་ལ།།
མི་འདོད་ལས་ཀྱིས་སོན་པ་མ་ཡིན་པར།།
བརྩེ་ཆེན་དྲི་མེད་ཟེར་གྱི་འགྲོ་ལ་འཁྱུད།།
ལུགས་གཉིས་སྟོན་པའི་དེད་དཔོན་དམ་པ་ཞིག

ལྗོངས་འདིའི་བསྟན་འགྲོའི་མགོན་དུ་བྱོན་ནས་སུ།།
སྔོན་བྱོན་དམ་པའི་ཕྱག་བཞེས་མ་ཉམས་པར།།
ཚུལ་བཞིན་ཉམས་བཞེས་གནང་ཞིང་བསྟན་འགྲོ་ལ།།
ལྷག་བློ་དཀར་བས་སྲིད་ཞུ་མི་དམན་མཛད།།

གྲུབ་པའི་དབང་ཕྱུག་ལུང་རྟོགས་རྒྱལ་མཚན་གྱིས།།
སངས་རྒྱས་གླིང་པའི་གཏེར་བདག་རྣམ་རོལ་པའི།།
ལྕགས་མདུད་ཤེས་རབ་རྒྱལ་མཚན་ཡང་སྤྲུལ་ཞེས།།
མཚན་གྱི་ཅོད་པན་གསོལ་ཞིང་ཕྱག་ཡིག་གནང་།།

འཁྲུལ་མེད་ལུང་གིས་བསྔགས་པའི་སྐྱེས་མཆོག་དེ།།
སྔ་འགྱུར་མདོ་སྔགས་བསམ་གཏན་ཆོས་གླིང་གི།།
ཡང་དར་བསྟན་འཛིན་བླ་རབས་བཅུ་གཉིས་པ།།
ཤེས་རབ་རྒྱལ་མཚན་མཆོག་གི་གྱ་སྟོན་བསུ།།

ཆོས་བརྒྱད་སྒྱུ་མའི་གར་ལ་མ་ཆགས་པར།།
བློ་སྣ་ཆོས་དང་བླ་མར་རྟག་དུ་གཏད།།
བཤེས་གཉེན་དམ་པར་དུས་ཀུན་རབ་བསྟེན་པའི།།
མཚུངས་མེད་བཤེས་གཉེན་ཁྱེད་ལ་དད་ཕྱག་འབུལ།།

རབ་འབྱམས་རྒྱལ་ཀུན་གསུང་གསུམ་གཅིག་འདུས་པའི།།
བཅོམ་ལྡན་ཚེ་དཔག་མེད་པ་ཚེ་འཛིན་ལྷས།།
སྐུ་ཚེ་མི་འགྱུར་རྡོ་རྗེ་ལྟ་བུར་སྲུང་།།
བཞེད་དོན་གེགས་མེད་ཡིད་བཞིན་འགྲུབ་གྱུར་ཅིག།

བསླུ་མེད་སྐྱབས་དང་དམ་ཅན་སྲུང་མ་ཡི།།
བྱིན་རླབས་བདེན་མཐུ་ཟབ་མོའི་སྟོབས་བསྐྱེད་ན།།
བསྟན་དང་འགྲོ་བའི་དོན་དུ་འཚོ་བཞེས་གསོལ།།
ཕྲིན་ལས་སྣང་བའི་ས་གསུམ་ཁྱབ་གྱུར་ཅིག།

འོད་གསལ་གཞི་དབྱིངས་ལྷ་ལམ་ཡངས་པོའི་ངོས།།
ཉམས་རྟོགས་སྐར་ཚོགས་འཕྲེང་བ་རབ་ཏུ་མཛེས།།
ལུང་རིགས་ཉི་གཞོན་བར་ཆད་སྤྲིན་ཚོགས་བརྒལ།།
ཆོས་ཀྱི་གྲུ་ཆར་རྟག་ཏུ་འབེབས་པར་ཤོག།

ཅེས་དམ་པ་གང་ལས་དབང་ལུང་མན་ངག་སོགས་ཀྱི་བཀའ་དྲིན་ཐོབ་པའི་ཉག་ཁྲ་པ་པུཎྱེ་ཤྭ་རས་སྐུ་ཉིད་དགོངས་གྲངས་བརྒྱད་ཅུར་བཞེས་པའི་གྱ་སྟོན་བྱེད་སྒོ་ཐོས་ཕྲལ་༢༠༢༣ལོའི་ཟླ༡པོའི་ཚེས་༡་ལ་རང་ཁྱིམ་དུ་ལོ་སར་དང་ལྷན་དུ་བྲིས།།

࿐མཆོག་སྤྲུལ་༧གསང་སྔགས་བསྟན་འཛིན་གྱི་ཞབས་བརྟན་སྨོན་ཚིག་བཞུགས་སོ།།
རྟེན་ནས་འབྱུང་བའི་དེ་ཉིད་སྨྲ་བ་ཡི།།
ཟླ་མེད་སྟོན་པ་མཆོག་གྱུར་དོན་ཀུན་འགྲུབ།།
གངས་ཅན་འགྲོ་མགོན་མཁན་སློབ་ཆོས་རྒྱལ་སོགས།།
རིམ་བྱོན་གསེར་གྱི་ཕྲེང་བས་དགེ་ལགས་སྩོལ།།
ཐུབ་ཚུལ་ཉི་འོད་སྙིགས་ལྔའི་སྨག་གི་ཀློང་།།
ཆེས་ཆེར་ཉལ་བའི་དུས་ཀྱི་ཡང་མཐར་འདིར།།
སྤྱི་སྒོས་བསྟན་པའི་ཁུལ་གྱིས་མི་ངལ་བའི།།
༧གསང་སྔགས་བསྟན་འཛིན་ཞབས་པད་ཡུན་བརྟན་ཤོག།
རབ་བྱུང་བཅུ་བདུན་པའི་ཆུ་སྦྲུལ་ཟླ་༡ཚེས་༢༠ཕྱི་ལོ་༢༠༡༣ཟླ༣ཚེས་༢ལ་སྦྱར་བའོ།།

࿐བློ༵་གྲོས་སྒོམ་པའི་སྟོབས་རབ་རབ་རྒྱས་པའི། །
བཟ༵ང་པོའི་རྟགས་མཚན་དུ་མས་རབ་རྒྱན་ནས། །
སྙ༵ན་པའི་བ་དན་ས་གསུམ་ཀུན་ན་ཁྱབ། །
འབྲུག་ལྟར་གྲ༵གས་པའི་མཚན་སྙན་ཁྱོན་ཀུན་ཁྱབ། ། ཚ་བུ་ནས་བྲིས།