ནམ་ཞིག་ཚེ་ཡི་འདུ་བྱེད་འཐོར་བའི་ཉིན།།
མི་འདོད་སྡུག་བསྔལ་འཇིགས་པ་བརྒྱ་ཕྲག་དག།
མྱོང་མི་དགོས་པའི་ཐབས་ཀྱི་དམ་པ་མཆོག།
ད་ནས་སྒྲུབ་ཅིང་ཡིད་བཞིན་འགྲུབ་པར་ཤོག།

“ཚད་མ་རྣམ་འགྲེལ་གྱི་དོགས་དཔྱོད་ལེགས་བཤད་དངུལ་གྱི་ཕྲེང་བ་ཞེས་བྱ་བ་བཞུགས་སོ།།”ཕྱག་དཔེ་འདི་ཉིད་རིགས་པའི་དབང་ཕྱུག་འབྲས་སྒོ་མང་ཀླུ་འབུམ་ལྷ་རམས་པ་མཚན་མཆོག་བརྗོད་པར་དཀའ་བ་དོན་སླད་མཚན་ནས་སྨྲས་ན་ཆོས་རྗེ་བློ་བཟང་དགེ་འདུན་གྱི་དཔེ་ཁྲིད་སྒྲ་བཤུས་ཤིག་ཡིན་ཞིང་།འདི་ཉིད་བྱ་མདོའི་ལྷ་རམས་པ་སྐལ་རྒྱམ་མཆོག་གིས་ཞུ་བསྒྲིགས་ཀྱི་བརྩོན་པ་གནང་བ་ཞིག་ཡིན་འདུག ཕྱག་དཔེ་འདི་ཉིད་ལོ་སྔོན་མར་འཕགས་ཡུལ་གྱི་གདན་ས་ཆེན་མོ་དཔལ་ལྡན་འབྲས་སྤུངས་སྒོ་མང་གྲྭ་ཚང་དུ་དཔར་བསྐྲུན་བགྱིས་ཤིང་སྐབས་དེར་ཀླུ་འབུམ་ཁམས་ཚན་དུ་འགྲེམ་སྤེལ་བྱས་པ་བཅས་མིག་ཡིད་རྣ་བའི་དགའ་སྟོན་དུ་གྱུར་མྱོང་མོད།དེ་རིང་བར་དེབ་མཆོག་འདི་དང་དངོས་སུ་མཇལ་སྐལ་མ་བྱུང་།གུས་དམན་རང་ལ་མཚོན་ན་དམ་པ་ཁོང་གི་སློབ་བརྒྱུད་ལ་ཆོས་ཀྱི་འབྲེལ་ཟབ་ཞིང་ཁྱད་པར་དུ་ཁོང་གི་གདན་ས་ལཱ་མོ་བདེ་ཆེན་ཆོས་འཁོར་གླིང་གི་དགེ་འདུན་འདུས་སྡེའི་གྲལ་མཐའ་ཙམ་ཟིན་མྱོང་ཞིང་།ཁོང་གི་དབང་ལུང་ཁྲིད་གསུམ་ལས་ཕྱི་མའི་བྱིན་རླབས་ཀྱི་རྒྱུན་མ་ཉམས་པར་བསོད་ནམས་རྣ་བའི་དཔྱིད་དུ་སྨིན་མྱོང་ནི་ད་ལྟར་ཇི་འདྲའི་སྐལ་བ་བཟང་འང་སེམས་སོ།།ད་ལན་མདོ་ཁམས་སྟོད་ཀྱི་ས་ཆ་འདི་ལྟ་བུ་ཞིག་ཏུ་ཁོང་གི་གསུང་རྩོམ་འདི་དང་ལས་ཀྱིས་མཇལ་ནས་བླུ་སྐལ་བྱུང་བ་ནི་ཕ་ཡུལ་དངརྒྱང་ཐག་ཅུང་རིང་བའི་ཡུལ་རྒྱུས་མེད་འདི་འདྲར་དམ་པ་ཁོང་དང་དངོས་སུ་མཇལ་བ་འདྲ་བའི་དགའ་སྤྲོས་ལྟོས་སོ།།འདི་ཡང་སྔར་བསགས་བསོད་ནམས་ཀྱི་འབྲས་བུ་ཆུད་མ་ཟོས་པ་ཞིག་ཡིན་པ་ནི་གདོན་མི་ཟའོ།།

“དེང་ནས་བྱང་ཆུབ་སྙིང་བོར་བདུད་སྡེ་ལས། །

ཇི་སྲིད་རྒྱལ་བར་མ་གྱུར་དེ་སྲིད་དུ། །

སྐྱེ་ཞིང་སྐྱེ་ཞིང་སྐྱེ་བར་ཁྱོད་ཀྱིས་རྗེས་བཟུང་ནས། །

གསུང་གི་བདུད་རྩིས་ངོམས་པ་མེད་པར་ཤོག ། ”ཅེས་པའི་གསོལ་འདེབས་ཀྱང་ངག་ནས་དབང་མེད་དུ་ཐལ་ལོ།། གུས་པ་གྲོལ་སྡེས།

ལྷུན་སྟུག་རྫ་རིའི་སྨུག་སྤྲིན་ཞལ་ཁེབ་སྒྲོན་པའི་འོག་ན། །
ལྷུང་ལྷུང་དྭངས་བསིལ་འབབ་པའི་བརྒྱད་ལྡན་མཚེའུའི་ངོགས་སུ། །
རྩོལ་བའི་མ་བསྒྲུབས་རང་བྱུང་རིན་ཆེན་བྲག་རིའི་ཕུག་པར། །
མ་བཅོས་ལྷུག་པར་སྡོད་པའི་བྱར་མེད་རྣལ་འབྱོར་སྐྱིད་པ། །

—— པདྨ་མདོ་སྔགས་རྒྱ་མཚོ།